Śląskie jodło i niy ino…
W Miejskim Przedszkolu z OI nr 1 w Lędzinach i mali i duzi ludkowie mogom poznować śląskie tradycje.
"Rozchodzi się nom ło to, co by wiedzieć skond my som i poradzić rozprowiać po naszymu. Latoś, juzaś łod września w kożdy czwartek nasze bajtle mogom probować śląskiego jodła. I tak na łobiady wcinomy zupy z nudlami, wodzionki, kartoflanki, łoberiby, ajntopfy, gumiklyjzy, krupy, szałoty, rolady abo karminadle do tego zołza, ciapkapusta abo kapusta modro, brat kartofle z kiszką, ajerkuchy czy buchty. Dycki na śniodanie małe jedzoki same łonaczom se sznity z kyjzą, tomatom, wusztem abo jajcym i piją bon kawa abo tyj. Na drugie śniodanie bajtle maszkiecom kołoczki, zisty, kreple, kołocze z płonkami i skurzicom abo z posypkom czy apfelmusy i apluziny. Cołki tydzień dzieci wyglądają czwortku i do kupy z fratrami poznają śląsko godka." - mówi dyrektor Miejskiego Przedszkola nr 1, Joanna Chowaniec.
"Chcymy się tyż poasić, że u nos niy ino jodło jest śląskie. Momy tyż regionalno ancla, w kieryj stoi byfyj pełny szolek, zbonków, biksów, kelni, krauzów i gorczków, kolybka z betym, lojfer na delówce, stół z ryczkami i heklowanym serwetym; są tyż karbidki, żelozka z duszami, radio pionier i kupa inszych klamorów z downych lot. W tyj ancli jest tyż „frelka” łobleczono w śląskie łachy: mo kiecka, spodnica, kabotek z wybiglowanym kraglym, korzet, zopaska, szlajfki z maszkami i winiec na gowie. Te eksponaty snosiły całe familije po swoich starzikach i starkach, bestoż nasze rechtorki zrychtowały snich „kątek” regionalny. Jedna swoczka łobiecała nom chnet złonaczyć do łokien gardiny. Na fajrant cykli my se pora fotek, coby się wom pochwolić." - dodaje.
A dyć wlyźcie do nos to łoboczyć i pospominać stare dzieje… Nojlepij bez tydziyń - we czwortek, bo bydziecie mogli ku tymu do szpasu pomaszkiecić naszego śląskiego jodł.
